最討厭的電話鈴聲

可能莎莉見我近排忙，驚我出唔到文，所以醒我一腳，來個《最討厭的電話鈴聲》tag。

其實我冇乜特別話討厭邊一隻鈴聲，因為我討厭所有電話鈴聲。由於工作關系，無時無刻都會收到電話。而個個電話都好似嚟奪命追魂咁。所以電話一響，個心就好似跳出嚟咁，驚哩到出事，嗰到有問題。哈哈哈！

不過舊年貪得意，想要部摺機，所以出多咗一部電話。而哩個電話號碼並冇「對外開放」。知道嘅，都只係得 Jayson 媽同埋幾個朋友。所以電話一響，就知道應該係「開心」電話。

講番電話鈴聲，其實我唔係好鐘意啲歌仔鈴聲，甚至乎有音樂旋律嘅鈴聲都唔係好鐘意。因為我唔想去迫人聽我鐘意嘅歌，所以都希望人地唔好迫我聽。喺公司啲同事，個個都有唔同鈴聲。雖然對我嚟講，可以當作最新流行曲資訊，不過聽得多都幾厭。所以喺公司，我通常都會轉震機。而我嘅電話鈴聲都係最普通最普通嗰種。嚀嚀…嚀嚀…嚀嚀…

「歡迎參加XXXX（我個名）嘅有獎留言遊戲。請喺『嘟』一聲之後留低你嘅姓名同電話。你將會有機會得到大獎一份，就係本人盡快覆你電話喇。」

以上係我好多年前個電話留言信箱嘅開場白。絕對原創，但好無聊。我記得以前好似講過。有個細路打錯電話，真係留低咗姓名同電話，以為有獎抽。哈哈哈…



~ Lindberg