漢堡包之 Burger Room

早前去 Shake'em Buns，食過好難食嘅漢堡包之後，今次嚟到嗰次原本想去嘅 Burgeroom。希望唔會再次失望而回。

Burgeroom地址：銅鑼灣加路連山道7號地鋪電話：2890 9130

我地叫咗一個煙肉芝士漢堡包、炸魚薯條、同埋一個炸芝士條。

個芝士條好明顯係叫貨番嚟就咁炸。味道一般，不過可以拉到好長，都幾好玩！哈哈哈…

「唔好玩你啲食物，除非你食緊你啲玩具！」

知唔知以上係邊位嘅名句呢？（答案：加菲貓）

炸魚薯條好唔掂。唔知係唔新鮮，或者係用咗炸魚柳包啲頭頭尾尾，極之腥。食咗幾舊就頂唔順。Jayson 媽可以食得好腥，就話問題唔大… 薯條就好脆。

漢堡包就唔錯。漢堡扒都係好似 Shake'em Buns，鬆散嗰種（我唔係太鐘意），不過都有啲咬口，唔係人地好似發水麵包咁核突。好多汁，亦都有肉味。麵包香軟，仲有個粉紅色嘅醬汁，味道唔錯。

地方非常舒服。我地坐沙發，真係舒服到可以坐成日。

~ Lindberg


P.S. 同場有兩個妹妹狂影相，相信之後都係放上網誌用。當時我同自己講，我唔可以寫得慢過佢地！嘩哈哈哈哈… 傻咗。