九個月大

「我尋日九個月大啦。等我自己報告一下啲進展先！」

「我食緊三餐奶、一餐飯、一餐果汁。有時仲有婆婆靚湯。尋日爸爸俾咗幾啖東星班我食。好好味呀！不過爸爸話係見冇油冇豉油先俾我食。而且又話大魚含唔知乜野重金屬多，所以食得少少。嗚嗚…」

「爸媽近排湊我湊到好攰，所以唔記得幫我磅重。我估自己冇乜肥到。」

「表姐放緊暑假，有時會嚟同我玩。婆婆屋企出面有個平台。有好多地方我行來行去（用學行車）。Florence 姐姐都好錫我。」

「我鐘意坐定定。自己玩。唔鐘意爬。唔鐘意玩 Tummy Time。姐姐都好錫我，成日都同我玩。不過爸媽成日都好擔心姐姐，驚佢唔舒服。」

「我最近學識拍手、拜拜、同埋擰頭。心情好仲會唱自己作嘅歌仔。」

「我近排鐘意睇兩個廣告。一個係全知賢姐姐。另一個係『衍生開奶茶』，好似好好味咁… 爸爸都好鐘意睇呢個廣告，因為後面有一班 Maid 姐姐。」

「爸爸近排好忙。侵略地球嘅大計暫時放埋咗一邊。我就可以趁機休息下啦。報告完畢！」



~ Lindberg