當日中一仔

飛天火羽可能見我尋日又「脫期」，特別醒我一腳。感激不盡，就此謝過。其實都有好多野想寫，不過真係有心無能力。有朋友見到前日我放阿仔啲相，因為差不多成個禮拜都冇 Jayson 出場，都話突然間好似大個咗。

要我回想做中一仔嘅時候… 擺明考我記性。等我以極速回答！

中一… 屈指一算，都已經係十三年前嘅事（如果我係 26 歲…）。

1) 問：第一日踏入你要入讀的中學，見到什麼令你最難忘？答：唔係好記得！但我反而好記得小一嘅第一日。因為小息我一個人喺操場行來行去，都唔知做乜好。鐘聲一響唔知點算。唔小心輕輕踫到個神父，然後就俾佢捉咗去打。哩個仇，我會記佢一世！以前就話細個乜都唔識，但如果咁嘅人都上到天堂，我一定向上面嗰個投訴！
中一… 當時學校未搬，仲喺半山。只係記得黃黃嘅禮堂，好多細路（我係其中一個）。好緊張，發生乜事都唔知。坐校巴返學，轉個頭就坐校巴走。中間一片空白…

2) 問：中一係拎個咩樣書包？
答：唔係好記得！應該係個 Nikko 背囊。當時好多人用㗎！

3) 問：中一的班主任還記得叫什麼名字，教你什麼科目嗎？
答：差啲唔記得。好彩記得佢個花名。係「姣婆井」，Miss Cheng。教數學的。個花名一啲都冇改錯。有乜人會著件白色薄衫，入面著件顏色胸圍呀？！最慘係個樣唔得。為不少同學留下童年陰影。

4) 問：還記得第一個主動跟你結識的同學是誰嗎？現在還有聯絡嗎？
答：唔係好記得！莊周乎？好似唔係。可能係李斯。依家係我個牙醫。

5) 問：中一時參加了什麼課外活動，對你日後有大影響嗎？
答：中一好似入咗個科學教派，乜都冇做過。中二或三反而記得清楚啲。同莊周參加咗中文學會。除咗因為我地對中國文學有濃厚嘅興趣（自己講都唔信），個 Miss 仲幾靚添（主要原因）！對日後嘅影響？咪會考中文差啲肥佬，同成日望女仔囉！

有興趣玩下哩個 Blog Tag 嘅朋友，都嚟接一接呀！



~ Lindberg


P.S. 都寫咗 33 分鐘喎。