一人一 iPhone

我終於等到今日啦！可以正正式式出部 iPhone！

如果要買 iPhone，好多人都知要上網登記。然後會有人打電話俾你，話去邊到攞貨。星期日就有個人打俾我，叫我去粉嶺攞。佢話哩部係有人唔要先可以預先俾我，如果唔要，就要等下一批。但係我要去探郭小姐，只好拒絕咗佢。而且粉嶺咁遠，我未至於咁心急。

點知星期一食午飯之前行過 3，見唔多人就走去問清楚啲轉台手續。個姐姐問我有冇上網登記。我話有。佢就話可以即刻俾部機我！因為我想要白色 16G，佢話過幾個鐘就有貨，到時打電話叫我嚟攞。於是我就走去食午飯。

喺餐廳門口，公司有人打俾我，搞到我企喺條街上面講咗成個鐘電話！講完正想入去之時，3 姐姐就打俾我！有電話攞，仲洗乜食飯呀。於是我就買咗個雞蛋仔，食住跑去攞電話。

辦理轉台手續都要啲時間。足足整咗半個鐘有多。但係原來咁都未算耐，貼保護貼仲耐！

Fred 哥同郭生都極力推介用 Zaag 嘅 Invisible Shield。我之前上咗 298 留名訂咗一塊。幫我黏埋，收我 $240。我手汗多，又會手震，自己點黏呀。六點幾就放工「飛」去俾佢黏。可能新款 iPhone 嘅關系，哥仔唔係好熟手。塊保護貼要噴水先可以放得上去，仲要等啲水乾要可以攞走。加上好多人排隊要佢貼。一次過貼四五部機，我差啲唔認得邊部係自己嘅！最後，足足等咗我個半鐘！差啲晚飯都食唔到，仲俾人鬧死添！

對於一個蘋果用家，iPhone 真係一件恩物。加上近排做到一頭煙，開始有番小小自己嘅時間，就嚟一份咁嘅禮物（雖然係自己買），真係好感動。

我喺 3 選擇咗 $498 無限上網計劃。對於一個屁股成日痕癢嘅人，任何地方都可以無限上網係非常之重要。不過睇番暫時嘅數據，我一日都係用咗 10MB 傳送。其實一個月 500MB 都應該好足夠。玩大咗添… 嘻…

除此之外，3 雖然有無限網內短訊，網外就收 $0.6 一個，而 $18 嘅短訊套餐都只係有 40 個網外短訊。平時公司都好興用短訊溝通，40 個夠鬼我用咩！希望遲啲有類似 MSN 嘅軟件（依家只係有 AIM），到時一人一部 iPhone，就可以二十四小時玩 MSN 啦。哈哈哈！



~ Lindberg