慶祝母親節

其實之前威威同 Julie 都有幫媽媽慶祝母親節，今年有咗 Jayson，本應該好好慶祝一下。不過我地兩個近排都攰到嘔，加上怪自己近排冇乜心情，星期日唔想出街同人迫，所以同嫲嫲講，話星期一先同佢去飲茶慶祝。星期六就去接 Jayson 媽放工，食一餐豐富嘅午餐，同埋陪佢剪個靚髮。

午餐去咗西環嘅「濤」，因為冇揸車，而且就近 Jayson 媽工作地方。

濤 Oonami
地址：西環堅尼地城加多近街39號地下
電話：2817-6626

其實早兩個禮拜都去過。當時我食咗個碎魚生飯。

雖然擺到明係啲頭頭尾尾，不過都幾新鮮。而且只係收 $55，想點呀？ 見隔離檯叫咗個 $138 嘅自選八件壽司定食，好似幾靚。喺銅鑼灣食開都要近 $180。心郁郁，所以決定再嚟過。
今次一人叫一份。可惜… 竟然比唔上 $55 嘅頭頭尾尾。

有幾件魚生嘅質素麻麻。帶子仲要唔係好新鮮。不過都叫做過得去啦。臨尾叫多個士多啤梨雪榚。據聞好好食，點知真係好好好好食！哈哈哈！

食完飯就去搵約翰。Jayson 媽剪碎啲頭髮迎接夏日，再加一個焗油。我就乖乖地，剪薄就算，冇電，冇整色整水。不過剪完，除咗發現塊面同 Jayson 一樣咁圓，仲發現自己好似「佬」咗好多添。天呀！唉…

Jayson 媽除咗係一個好媽媽之外，仲係一個好 Zoo Keeper。佢依家唯一嘅娛樂，就係喺休息嘅時間玩 NDS 嘅 Zoo Keeper。哈哈哈！

當日嘅晚飯就去同婆婆慶祝母親節。

星期日因為 Jayson 無端端發燒，所以更加要係留喺屋企。湊住 Jayson 簡簡單單過一日。晚飯原本想出街買啲野返嚟煮，不過都係得個講字。最後都係叫薄餅算數。唔知係唔係人人都等緊睇英超決賽，叫個薄餅等咗足足等咗兩個鐘！自己整的話，食完洗埋碟都仲得！

今次叫咗個扭扭批。上幾次叫嗰啲新款薄餅都好唔掂，對上一個迷迭香雞可以用非常難食嚟形容。不過最主要原因都係啲廚師冇心機整。

今次個扭扭批就正常得多。起碼啲料好味啲。不過都係嗰句，個大廚設計菜式冇為客人著想。薄餅上面放菠蘿，堂食冇問題。但係如果揸得唔夠乾水，外賣時就會出水，搞到個薄餅核核突突。可惜…

我冇為 Jayson 買啲乜野做母親節禮物，因為搵唔到乜野啱心水。都係等 Jayson 大個自己搞掂啦。但係又冇理由冇啲表示，唯有子債父還，錢債肉償，幫 Jayson 媽來個按摩啦。嘻…

希望各位媽咪都可以過一個開心嘅母親節啦！



~ Lindberg