從未如此令人失望的漢堡包

尋晚走咗去早前有線阿蘇介紹過嘅 Shake'em Buns。原本一心可以食到一個好好食嘅漢堡包，點知… 從未如此失望過。唉…

Shake'em Buns
地址：銅鑼灣開平道5號地下
電話：2572 6220

話說尋日睇咗 natchan 講 Burgeroom，睇到流晒口水。我好鐘意食漢堡包。燒得香香嘅漢堡扒、軟熟嘅麵包、茄汁、芥辣、酸瓜… 忽然間變成個道友咁。於是我夜晚就同 Jayson 媽去展開尋找漢堡包之旅。

我只係記得間野係喺加路連山道，但唔記得正確地址。於是用手機上網睇番篇網誌。行到加路連山道先發現，原來間餐廳喺一頭，我地喺一尾。因為冇時間行，於是就去咗附近嘅 Shake'em Buns。

入到去，自己興高彩烈。見個餐牌啲名都幾得意，而且樣樣都聽落幾好食。於是就叫咗一個普通嘅蕃茄生菜漢堡包（一開二）、炸魷魚圈、炸薯條、藍莓奶昔、同埋一支啤酒。多謝盛惠 $183。唔平，不過如果好食就一定可以接受。

買完之後見到個牌。上面寫住（類似）：我地唔係 Burger King。BK 出名你想點就點。佢話喺佢地餐廳，人客只可以食到佢地嘅做法。換言之，即係對自己產品好有信心，唔會照客人個人喜好亂咁改。好似好囂張，不過如果好食就一定可以接受。

可惜…

先講主角：漢堡包。我可以用「難食」去形容。漢堡扒非常鬆散，有啲汁，但冇肉味。以我經驗，應該係啲免治牛肉有過多血水，加咗蛋，或者放咗麵包糠。我估應該係太多血水居多。我唔知哩樣係唔係佢嘅特色，不過鬆散程度有啲似發水麵包。加上啲肉可能唔夠脂肪，所以冇乜味。食落口都唔似食緊漢堡包。但係都未算係最失敗嘅野。包裡面啲菜同蕃茄非常冰凍。放喺一塊熱漢堡扒之上，感覺非常曖昧。如果佢嘅賣點係冰火二重奏，只好怪我唔識欣賞喇。

炸魷魚圈，啲粉好厚，而且有啲「骨肉分離」。骨肉分離應該係因為上粉前冇將魷魚圈抹乾。不過睇個樣，啲魷魚圈應該係買番嚟已經上晒粉。魷魚本身冇乜味，同埋啲粉都幾滯。通常啲人會跟他他汁，因為入面有啲酸瓜，會冇咁滯口。不過佢地只有蛋黃汁，滯上加滯…
炸薯條，食第一條又熱又香，覺得好好味。不過我越食就越落得多茄汁。起初都不已為意，之後 Jayson 媽講咗一句，我就明晒。「啲薯條冇乜薯仔味。」果然好似個牌一樣，哩到唔係 BK。如果係 BK，啲野點會咁難食？我唔知用唔同嘅薯仔分別有幾大，不過 BK 用足「反式脂肪」去炸，所以特別脆同好味。雖然好似好唔健康，但試問成餐飯有邊樣野健康呀。食哩啲野就應該預咗啦，而且又唔係日日食。

最好味都係杯藍莓奶昔…

我好少可彈人地啲野唔好食，因為我覺得味道嘅野係好主觀。不過我嘅要求都好基本，亦都係一啲客觀嘅烹調要求。個肉餅仲鬆過個包真係好難接受。唉…

番到屋企上 OpenRice 一睇，第一個食評同我講嘅一模一樣。早知就… 唉… 有早知，冇乞兒。



~ Lindberg