完美的早餐：納豆飯

尋日見雪櫃有碗隔夜飯，再加埋先前買嘅納豆，正好叮熱啲飯嚟做碗納豆飯做早餐！

我成日都覺得，如果早餐有碗飯食，係一件好幸福嘅事。
納豆哩種日式食品，唔係人人都鐘意食。滑潺潺，發酵嘅味道又怪怪的。好多年青嘅日本人都唔係好鐘意食。不過我就好鐘意。除咗營養豐富之外：

跟據 Wikipedia 所講：納豆是日本常見的傳統發酵食品，由黃豆通過納豆菌（枯草桿菌）發酵製成，具有黏性，不僅保有黃豆的營養價值、富含維生素K、提高蛋白質的消化吸收率，更重要的是發酵過程產生了多種生理活性物質，具有溶解體內纖維蛋白及其他調節生理機能的保健作用。

我就係鐘意佢滑潺潺。就好似有啲人鐘意食榴槤或者臭豆腐一樣，旁人可能唔明白，不過鐘意就係鐘意。
第一次食納豆，應該係喺：

Bee Japanese Curry Shop
地址：銅鑼灣謝斐道524號地下
電話：2838 9633

當時佢有個納豆吞拿魚碎飯。膽粗粗叫咗個嚟食，之後就愛上咗。但係可能因為冇乜人會叫，所以佢地之後就刪除咗。可惜…可惜…

而去日本旅行我就最開心，因為朝朝都可以食納豆撈飯。

依家如果屋企會連續煮幾日飯，我都會買一包三盒嘅納豆番去撈飯食。

通常每盒入面都有一兩包汁。今次我買哩盒就有包醬汁同芥辣。

真係好滑潺潺㗎！

將兩包野倒落去之後攪勻，然後放上飯到。攪之時其實都幾核突，好似一堆黏液咁。據說（將太的壽司），如果不停攪，就可以變番一粒粒。以生化角度嚟講，應該做得到。我曾經試過用九牛二虎之力去攪，越攪越核突。不過我相信再攪落去應該得，但係最後都係放棄咗。

如果有蔥花可以加幾粒，仲好味！就算連唔食蔥嘅我都會食呀！最後伴幾片紫菜，最美滿嘅早餐莫過於此。

~ Lindberg