好煩好煩

近排都唔知行乜衰運。公司啲野好煩，屋企（與 Jayson 母子無關）仲煩。一個頭變成兩個大（原本已經夠大啦！）。唉…

我個人好衰。個腦唔可以唔諗野。遇到任何野，個腦就會全速前進，左諗右諗，四方八面咁諗，搵出所有可能性。咁樣做，當然係有佢嘅好處。但係有時諗多咗，非常吃力。可知用腦所需嘅能量，同短跑差不多。不過又唔見我瘦喎！唉…

而公司近排都係行衰運。今晚開咗成晚會（聽日繼續），傾咗好多野。雖然有啲「講就易」嘅感覺，不過都總好過乜都唔做。不過最大鑊都係個大廚俾「廉記」請去飲咖啡！我百份百相信佢唔會出蠱惑，收人回佣。但鬼叫我地其中一個大供應商出咗事，身為話事人，當然要俾召見啦。一個字：煩。點解啲人唔可以老老實實做野呢？今次好似幾多人俾召見。相信遲啲頭條會見到。

第一次接觸「廉記」，感覺佢地啲態度好差。可能係工作需要，一味講惡。唔好問，叫你俾就俾。同收數佬差不多。唉… 不過話時話，前排遇過啲軍裝警察叔叔。非常好禮貌，而且 EQ 好高。見到有啲好似佢地咁嘅人去維持香港治安，心都覺得好啲。

我睇我都要盡快去搵一搵車公爺爺，叫佢幫我轉個運先！



~ Lindberg