響應3月22日世界水日

聯合國自1993年開始，就將每年嘅3月22日定為「世界水日」，呼籲大家關注全球水源短缺問題。

UN Water 網站：
http://www.unwater.org

宣明會的呼籲：
http://www.worldvision.org.hk

其實我地呢一代嘅年青人，真係好幸福，好多都未試過無水用嘅慘況。最多都係喊話銀包無「水」（錢）。如果要水，一扭開水龍頭就有乾淨食水用，一按廁所就有水沖。

我依稀記得細個嗰時試過制水，不過都唔記得有乜大問題。但係睇番宣明會個網站，原來全球現時：

* 每六個人便有一個缺乏清潔食水
* 每五個人便有兩個缺乏衛生設施
* 每日有3,800名兒童死於因此而引致的疾病

雖然好難令你想像終日忍受口渴、無法保持個人及環境衛生、或者無水難以種植糧食嘅狀況，因為我都想像唔到。但係「久渴逢甘露」你點都試過呱。炎炎嘅太陽之下，汗水都已經被抽乾，一滴清水係幾咁甜美。嗰啲人咪日日都係咁試囉！

雖然話我地用小啲水，好似對嗰啲缺水地方無乜直接幫助，但係都可以算係為自己下一代出一分力。起碼佢地唔會活係缺水嘅環境下長大呀。而且用小啲水，無形中就已經係等於排放少啲廢物，即係環保啦！

水務署的網頁有教大家如何節約用水：

http://www.wsd.gov.hk/tc/html/info_publ/savew.htm

其中「用花灑淋浴」，我估大家都係做緊啦。香港人邊得嚟咁多時間開一大缸水沖涼呀。

而沖廁所水方面，雖然香港沖廁所係用鹹水，但係沖少啲，水務署就過濾少啲，所以用「雙掣式沖廁水」都係好嘅。

但係我覺得最難都係再用用過嘅水。洗地無理由用啲洗菜水去洗呱。而淋花又唔用得幾多水。不過都係一種習慣啦。

最後，最直接就係唔好玩水啦！仲細咩？！細都唔好玩呀！

節約用水，珍惜資源。


~ Lindberg