答案係： 雞蛋仔！
前一排見阿蘇係有線「一粒鐘真人蘇」到講雞蛋仔。佢聽聽眾講，去到西灣河太安樓檔雞蛋仔試下，阿蘇話仲好食過北角好出名嗰檔。我對檔野都有啲印象，不過未食過。尋晚諗住去試下。
見俾阿蘇講過都知會出事，但係無諗過咁出事！覺得阿蘇簡直有啲似美國個 Oprah Winfrey 一樣！
足足等咗我半個鐘！救命！
哥仔好明顯做到踢晒腳。比起阿蘇個節目入面（相信係上年拍落），多咗個幫手，多咗部電爐，貴咗一蚊！哈！前後排緊隊嘅朋友，同周圍啲路人都細細聲講，呢檔咪阿蘇介紹嗰檔囉。阿蘇好野！
雖然貴咗一蚊，都只係七蚊一份。格仔餅同價。
哥仔好好手尾，收完人地錢會抹手先整野食。個幫手就差啲。佢專責做格仔餅，不過就“呢啡”啲。
我好想同哥仔吹兩句水。但係佢真係太忙啦！兩隻手做唔停。手瓜好似仲勁過上電視嗰陣！又係多得阿蘇。佢豬年真係豬籠入水啦！
等咗半個鐘終於買到啦！
我覺得小人嘅時候應該會好食啲。依家都好食，皮脆、肉軟。我鐘意啲甜小小，同有蛋味嘅。不過如果可以慢工出細貨，咁就仲好啦。因為個皮都係差小小，未夠脆。但係啲肉真係唔錯，幾彈牙。好味！
~ Lindberg
沒有留言:
張貼留言