好難食嘅薯片

成日見《同事三分親》入面啲人攞包薯片係咁搖。見都好似好特別，我又買包來試下。點知難食到嘔…

可能係先入為主嘅關系。如果獨立每種味嚟食，應該可以想象得到係乜野味。青芥辣味薯片，應該唔會太差。三文魚味薯片就覺得有少少怪，不過都可以想象得到。但係生嘅三文魚刺身，好難想象佢加落薯片之後係乜野味道。依家仲要係三文魚壽司！有薯片味、生三文魚味、青芥辣味、醋飯味… 結果係完全想象唔到係乜味。

我覺得食物嘅味道，除咗係用條脷去品嘗，同個鼻去聞之外，個腦都扮演一個好重要嘅角色。為咗證實我呢個論點，我經常用 Jayson 媽嚟做測試（千祈唔好誤會我玩佢…）。例如檯面有杯蜜糖水，佢想飲，問我係乜嚟，我會話係菊花茶。佢飲落第一啖都唔覺有乜問題。第二啖就會覺得怪怪地。到第三啖先發現我玩佢（再次聲明，我並非玩佢…）。試過我話杯夏枯草係可樂，都真係得，佢只會問點解冇乜氣。而同樣情況亦多次發生係自己身上。由此可見，大腦係某程度上，已經預早判斷咗啲野係乜味。一包三文魚壽司味薯片，真係好難想象㗎。

而且珍珍隻薯片本身好重味，加上其他味道變得好奇怪。最後瞇埋眼食晒就算。除咗味道奇怪之外，包野都幾唔環保。袋中有袋，有點兒浪費啫。



~ Lindberg