腸粉早餐大比拼

放完新年假之後，公司附近間茶餐廳結咗業。以前如果屋企冇買定早餐，都會到哩間茶餐廳買個麵飽食。麵飽新鮮出爐，香噴噴嘅味道，為勞碌嘅一天增添力量。但自從佢結業之後，我就好似變成無主孤魂一樣。最後，只好向便利店埋手。

正所謂：梗有一間喺左近。公司對面，有兩間 7-11 同 一間 OK。兩間同樣有腸粉早餐，配埋野飲都係十蚊雞。於是我就分別試試啦…

先試 OK 便利店。腸粉 $5 一盒，加 $5 有杯熱咖啡、奶茶、或鴛鴦。

腸粉一般。可能係用機自動製造關系，粉皮比較厚，不過都算軟熟。阿姐落好多好多醬，多到我以為食緊湯腸粉。甜醬加麻醬，入口漿住晒，感覺上肥到不得了。

前後喺 OK 食過幾次，試過佢嘅咖啡、奶茶、同鴛鴦。味道雖然並非我鐘意嘅，不過都算飲得入口。

另一邊廂，7-11 有早餐定食，腸粉加三粒燒賣，同一杯熱朱古力。每客 $10。

腸粉同 OK 基本上係一樣，同樣有好多好多醬。不過唔知係唔係保溫儲存方法，或者係放耐咗嘅關系，腸粉有些少乾同硬。

賣點好明顯係多人地三粒燒賣。正所謂：「出得嚟玩，就唔係貪人地個果盤。」（知道喺邊套戲出嚟話你叻！）我係想食腸粉之嘛，燒賣揩到啲麻醬，味道怪怪的。

而且開粉嘅熱朱古力普通少少，誠意比 OK 欠奉少少。如果俾我選擇，我會話 OK 好啲啲。不過真係好肥，加埋杯超高卡路里熱飲，都係少吃為妙。



~ Lindberg


P.S. 其實之前公司後巷都有個阿伯賣腸粉，又滑又軟熟（當然係指啲腸粉！）。不過依家唔見咗嚕…