恭迎大佬出關！

近排喺眾多壞消息當中，終於傳嚟兩個好消息。呀…應該係三個。

之前因為威威嘅關系，我收埋咗自己。有一日打電話俾個郭生，點知佢屋企發生巨變。對於自己未能喺呢個時候支持朋友，心裡好難過。幸好兄弟處之泰然，我亦深感欣慰。正當終日愁雲慘霧之際，郭生今早打電俾我，給我一個震奮的消息：大佬終於出關啦！

想當年，郭生、大佬、同埋我，雖然大家喺大學讀唔同班，不過唔知點解玩得好埋（聲明：我地並無任何同性戀傾向）。正如劉關張於桃源結義一樣，我地就喺香港大學嘅 Chem Build，用 Lee Hall 一碟四腸早餐結為兄弟。

我想講多少少大佬呢個「傳奇人物」。我一直都好尊敬呢個大佬。大佬並非因為有任何（直接）背景而被叫做「大佬」。一副強健嘅體魄，黑實嘅身軀（再一次聲明：我地並無任何同性戀傾向），精通各家各路拳法，更嚴寒的冬天都只會穿上一件單薄的裇衫，而最令我們欣賞嘅，就係佢嘅頭腦。佢嘅思考方法很獨到，往往在處理不同事情上，以出乎我們意料嘅方法，嚇我地一跳。令我地萬分佩服。

但係因為一啲際遇嘅問題，呢好幾年大佬失咗蹤。大約年半前，我有搵過佢，計劃一齊去食「大茶飯」。可惜「茶飯」無疾而終。郭生同我見到大佬收埋自己，都覺得好可惜。

但今早佢突然打俾郭生，話佢已經諗通咗，想搵我地傾計。郭生立即向大佬報告我地嘅近況，今次輪到我地嚇佢一驚。佢一定冇諗過我會做人老豆。郭生同我都好開心。起義嘅時候終於到啦！

第二同第三個好消息都係來自郭生。好兄弟都快要做人老豆啦！經過一輪心驚膽顫嘅檢查，BB 證實健康。這個已經係天大嘅好消息。而除此之外，仲要係女！我差啲開心過佢地！哈哈哈！恭喜恭喜！


~ Lindberg


P.S. 威威，我地仲未收到您嘅好消息喎。您要加油呀！ 我地好愛您㗎！