原來尋日Zara個哥仔係啱嘅。對鞋襯到條褲時襯唔到件衫。出事！
早餐很灰。全西式，無肉骨茶！雖然肉骨茶唔係新加坡主力，但係就好似去日本食早飯無納豆！灰… （好奇怪。納豆對好多人黎講會係好核突，但我又好鐘意呀。怪獸！哈！）
下面幅相係我兩個姪女。左邊嗰個係我二哥嘅，右邊係係我細姐姐嘅。真係可愛到暈！仲好識氹大人！尤其是左邊嗰個。鬼靈精到死。見到佢地我都晒投降。
今日去Science Museum，個司機話一個鐘行得晒。行得晒佢個頭！入面好大。比起香港嗰個仲保養得好好多添。行到腳仔軟。
之後約左呢到做野嘅朋友食午飯，食海南雞。Yeah！津津海南雞好似話係最好食嗰間。又真係幾正喎。雖然都唔係好有雞味，不過都好嫩滑。仲食左個麥皮炸蝦。有點似避風塘式炒，不過唔用蒜頭而用麥皮。辣得黎帶少少甜，都幾特別。
跟住去唐人街買肉乾。好重…條街都幾覩，雖然落住毛毛雨，都影左啲相。
晚飯去Eastcoast Market。好似一大堆海鮮餐館。不過都唔肚餓，因為之前又去在個Lounge任飲任食。肥死啦呢鑊。又俾人笑啦…
叫左出名嘅辣蟹。真係辣到阿媽都唔認得。大哥食到出晒汗，去左厠所洗左個頭！我都唔見好得去邊。食到成個人熱到眼鏡都矇晒！不過隻蟹好香、好肉、好食。
大哥真係好低能。雖然做正經野好正經，但係一玩，就仲大細路過我 。都四十幾啦，我看是血統問題。即係黎緊嘅我都會無變。哈！係唔係應該話出事呢？
飯後去Night Safari。只係有時間坐車行一個圈。比以前多好多動物。其實個concept唔錯。好多動物園响朝早都無野看，班動物因為日頭，死下死下。夜晚涼啲，啲動物反而走晒出黎。
阿媽又俾封利是黎。仲細咩。個trip啲洗費已經未排到我俾啦。不過有人錫都幾好呀。哈！
新加坡都無野買。影左嘅相可唔可以做手信呢？
點解我覺得今次黎新加坡唔會見到魚尾獅嘅…
~ Lindberg
沒有留言:
張貼留言