又做敗家仔

早兩個星期陪 Jayson 媽去配眼鏡。自己就帶咗副舊鏡框去配鏡片。以前我鐘意用玻璃鏡片，因為唔會花。幾年前試過用膠，過幾個月就花晒，要換番玻璃鏡片。但上一次被人極力游說之下，話新型膠鏡好好。於是就再試一次。叫做識間眼鏡店，得都要一千蚊一對。雖然都幾貴，但係又真係好正喎！

新型膠鏡，除咗好薄、好輕、不碎之外，仲加咗一層塗層，令鏡片更易清理。塊鏡片差不多都唔洗抹。所以用過之後，我就想換埋副舊眼鏡嘅鏡片。

正當 Jayson 媽驗眼之際，我就四圍行。俾我睇見到一副同我依家戴緊嘅牌子一樣嘅眼鏡，視線立即鎖定。心入面個魔鬼同我講。與其換鏡片要成一千蚊，不如換埋個鏡框，費時一陣換咗又唔鐘意戴啦。佢講得好啱聽，因為我副舊框真係唔係咁好戴（因為塊面肥咗…）。

「依家哩副眼鏡好好戴，可惜係白色，唔可以日日戴。如果有副黑色就好啦…」心入面個魔鬼又同我講。又真係好啱聽。

之後… 唉… 破大財！我部 PS3呀！Devil May Cry 4 呀！嗚嗚…

突然記起以前返主日學，聽過一個聖經故事。一個妓女（喺 Da Vinci Code 入面好出名嗰個）為耶穌洗腳，用上等香油為耶穌洗腳，再用頭髮將佢抹乾。故事除咗叫我地要以最好嘅野去侍奉神之外，洗完腳，要記得抹腳呀…（窮到傻咗…）



~ Lindberg