加入幼稚園的舊生會

今日同事叫我好去報定 Playgroup，因為「嗰間」幼稚園大約要排九個月隊。之後 Fred 哥再嚇一嚇我，話佢朋友個細路，三個月大就報咗啦。心諗：「唔係呀嘛？救命…」

其實我都有諗過俾阿仔去同其他小朋友玩下。只不過咁早未有心理準備。跟住同事知我係嗰間幼稚園嘅舊生，於是叫我入埋佢個舊生會先。幼稚園都有舊生會，真係講都唔信。

想當年，阿媽話哩間幼稚園已經好難入。佢帶我去面試，我就乜都唔識。俾條香蕉我，我走去食咗佢… 好彩阿媽個朋友識得個校長，唔係我就實冇書讀啦。

細個啲野有好多都已經唔係好記得。不過幼稚園有幾件事，到依家都好記得。例如：

• 老師要我地拍手打拍子，我永遠都會打錯，之後俾人鬧。
• 有個肥妹仔好鐘意同我玩。佢仲住喺我對面樓嘅同一層，所以我地一開窗就可以傾計。不過讀完幼稚園之後，佢就搬走咗啦。
• 有啲日子可以帶自己鐘意嘅玩具返去同人玩，不過大家又唔會同其他人分享自己嘅玩具喎。
• 有次考試唔敢舉手去廁所，之後就…

我相信阿仔到時一定醒過我好多。

「當然啦，爸爸！」

~ Lindberg


P.S. 頭先坐的士返屋企，見隔離小巴上有個靚女對住我笑！正當我感到面紅之時，係睇真啲，原來係對住我大髀上嘅 Jayson 笑… 輸俾阿仔，心服口服呀…