直擊吞拿魚解體秀

據說鰂魚涌有間日本餐廳，每個月都會買條吞拿魚即場劏俾啲人客睇。劏完就當然會食啦！咁啱最近有啲特別日子可以慶祝，兩個人就走嚟試下。

伊藤酒菜處
Ito San
地址 : 鰂魚涌華蘭路25號大昌行商業中心G01地下
電話 : 2803 1803

一入門口，一條龐然巨物已經放在眼前。成條吞拿魚放係張壽司吧檯上，起初以為食黃鰭吞拿魚，但邊到有咁大條嘅黃鰭呀？問過先知原來係藍鰭。發達！

店鋪唔係好大，唔計吧檯，24 個位左右。我地坐低之後，時間都尚早。要七點過後人差不多齊先會開始。 我話同睇演唱會差不多。等待之際，就先食個前菜。

有四樣野，由左至右，燒響螺（有啲苦）、唔知乜野菜（滑潺潺，正合我意）、日本蠶豆（好味）、同埋三文魚芝士卷（放咗啲香草，好味）。

之後，師傅就開始表演啦！所有人都行出去吧檯睇野。行近咗，可以聞到少少嘅血腥味。好緊張呀！

師傅首先介下條魚，同埋一陣邊部份會點整。條魚來自日本九洲，重 66 千克。後來有人問條魚幾多錢。師傅話要港幣九萬大元！厲害呀！

整個過程都幾血腥。睇完差啲想轉行食齋。咁大條魚，我暗地裡話要幫條魚超渡一下先好食。

師傅三兩下手勢就切開晒條魚。嘩！好大塊　おとろ（大吞拿魚腩）呀！

當劏得七七八八，客人就開始埋位等食啦。

先嚟當然就係刺身啦！有 おとろ（大吞拿魚腩）同埋 中とろ（中吞拿魚腩）刺身！嘩…

先食 中とろ（中吞拿魚腩）。鮮味到完全唔識講。魚味好重，非常彈牙，無筋無渣。去日本都唔記得有冇食過咁好味嘅吞拿魚。

跟住食 おとろ（大吞拿魚腩）。油到呢… 救命！雖然有筋，不過塊魚肉嘅脂肪，俾口中嘅體溫慢慢溶解而釋放。越咬越香，非常好味！

食完收碟之時，侍應問洗唔洗添食。害羞的我，心諗冇理由有得免費添食，怕要收錢，於是簡單話唔洗就算啦。但原來真係有咁大隻蛤乸隨街跳！後面張檯問，原來真係免費添食！因為第二道菜已上，所以我地諗住食完先再問佢攞。

第二道菜係燒魚鮫。 即係兩邊魚鰭舊骨。一樣勁油！燒完都仲有咁多油，所以有醋汁同蘿蔔蓉俾我地點嚟食。不過一口仍然都係充滿魚油。我睇我有排都唔洗食深海魚油 Omega-3 啦。

食完魚鮫，就叫佢攞多四件 中とろ（中吞拿魚腩）嚟。真係勁好味！不過之後好後悔，因為仲有好多野食！

吞拿魚碎他他。西式做法，麵包有一陣好香嘅香草油味。洋蔥唔辣，仲好甜添！

跟住呢碟就勁啦。通常食魚，最矜貴就係粒面珠燈。吞拿魚面珠燈刺身真係諗都冇諗過。質地好得意，非常彈牙，不過好多幼筋，勁攝牙罅。

然後係燒茄子。上面有吞拿魚、菠蘿、蘑菇、芝士。雖然冇乜特別，不過我覺得隻茄子都好甜，幾好味。

食到哩到，其實已經好飽。魚油充斥咗每一個細胞，整個人非常呆滯…
但係重頭戲依家先上演：汁煮吞拿魚扒。 將吞拿魚煎到好香之後，用醬汁去煮。除咗啖啖肉之外，真係非常之好味！雖然都已經飽到嘔，我都完成我自己嗰份。

仲未完！我地可以選擇吞拿魚壽司或者蔥碎吞拿魚飯。壽司啲飯有啲乾，不過塊赤身就好好味。個蔥碎吞拿魚飯非常好味。個肚明明就爆，都全部食晒！

今次真係最後啦。甜品：芝麻雪榚。 好香好滑…

食後感： 餐廳細細間，兩個侍應服務得好好。但我相信我地有排都唔會食吞拿魚。亦都可能係哩個原因，師傅話表演埋下個月一次就唔玩（住）。玩得多，大家都厭啦，而且一條魚咁大條，我地食完之後肯定會賣好多日。一個唔好彩，冇人食就蝕埋！不過可以食到一餐咁新鮮嘅吞拿魚，真係勁開心！

有得食，有得睇，每位 $880。價錢都算合理。如果有興趣，就要快啲打電話去留檯啦！下一次好似係 4 月 25 日，已經有七八個訂檯啦！



~ Lindberg