浪子回頭

尋晚同班朋友出街食飯，慶祝三月份生日嘅朋友，亦即係我都有份。兄弟 Ardy 選擇地方。我一見間餐廳，就係到諗，我究竟做錯啲乜，Ardy 要我「浪子回頭」呢？

金不換泰國餐廳
地址 : 銅鑼灣波斯富街99號利舞台廣場6樓C-D店
電話 : 2890 1993 

其實今篇唔係講食。因為掛住笑，都唔記得食咗啲乜，只係記得幾好食。我地被按排坐喺出面個 podium 到，不過環境都可以，未算喺個電梯大堂到食咁慘。
整晚話題圍繞住其中一位剛剛創業嘅朋友。其實開一間公司真係有好多濕碎野要處理。記得好多年前，自己都面對過同一個問題。乜都唔識，就只好左問右問。好彩嘅係我只要專注內部運作，可以放晒啲精神落去做。我地成晚不停恐嚇佢，話佢哩樣冇做，嗰樣冇做，遲早勞工處同稅局上門拉人，洗定個八月十五去坐牢都得啦！嘩卡卡卡卡…

席上亦都提到 Jayson 節瓜俠嘅威名。問到節瓜英文係乜，個個都搔穿頭。好在有網上字典！

節瓜 （zit3 gwaa1）fuzzy melon; hairy gourd

…Fuzzy Melonman… 咁核突！最衰都係 Ardy！不過叫落又幾順口…

講開先知，原來有幾位朋友都有睇我個 blog，聽到有啲面紅。因為有時寫啲野都幾低能，希望唔好見笑。

諗下諗下，我都應該幫個 blog 改過個名。依家叫 Lindbergh's Wing，係因為想借助 Charles Lindbergh 之力，喺個 blog 入面自由飛翔。但係寫寫下，加上個肚腩越來越大，乜都飛唔起啦。唉… 所以我想改名！如果有睇開我個 blog，應該知道哩到係一個乜野地方。有食、有貓、有BB仔、仲有個白痴仔。如果有乜好建意，歡迎提出。一經採用，除永感聖恩之外，更可獲贈某餐廳現金卷乙張。呵呵呵呵… （我講真㗎！）



~ Lindberg