到新羅寶做食客

上星期五放低 Jayson 喺婆婆屋企，因為我地要出街買野送俾人。行街買野之前，發覺好耐都冇食餐好嘅。見天氣咁凍，除咗打邊爐，最好當然就係去食韓國燒烤啦！

新羅寶韓國餐廳
Sorabol Korean Restaurant
地址 : 銅鑼灣波斯富街99號利舞台廣場17樓
電話 : 2881-6823

冇訂位，但都好彩有位。雖然佢話八點半之後有訂檯，叫我地要交番張檯出嚟，我估都係例行說話，未必真係有訂檯。而且有個半鐘頭食，乜都夠啦！

因為近排有套韓戲《食客》上演，新羅寶都來個《食客》Special Menu。不過我地冇點到。兩個人去新羅寶，好多時都會叫套餐，因為唔洗煩。不過問題係份量太大，次次都食到反肚。見今次唔係好肚餓，所以就散叫。

先來一個特式沙律。我好鐘意食哩到啲新鮮蔬菜，除咗另類之外，啲醬汁亦好好味。我覺得做韓國菜，好多時都要切餐懞。啲野整得好靚，配搭好有心思。而沙律放梨我就最鐘意。又爽又甜！

之後來一客燒特級肥牛肉。好肥，好嫩，好正！$168 一客，有13 塊左右，都算幾抵食。不過可能因為要用特別嘅鐵板嚟燒，好鬼大煙…

最後就係試新野。喺新羅寶，我最鐘意食嘅係牛肉鍋麵。好食到不得了。但係今次試新野，叫咗個海鮮鍋（$200）。有一隻大蝦、一隻蟹、好多蛤蜊、細尤魚、等。麵醬湯底有好濃嘅蛤蜊味，但可惜啲蛤蜊好多沙。味道亦都太濃，唔係太啱口味。

每次食完都好期待佢碗免費糖水：冰凍松子薏米水。飲完乜野熱氣都冇晒！正！

其實都有一排冇嚟。發現啲人唔同晒。以前啲菲籍或尼泊爾籍員工唔知去晒邊。換嚟係一班年長些少嘅香港人，有點再陪訓嘅影子。而整體員工人數比以前多好多，所以招呼亦都好咗。值得一讚！



~ Lindberg