高科技迴轉壽司

之前睇過雜誌，話太古城有間高科技迴轉壽司。咁近屋企，當然要試一試。

千両
地址 : 鰂魚涌太古城中心1期1樓142B鋪
電話 : 2967 5537

舖頭唔算好大，我估 60 個座位左右。裝修簡單得嚟都幾靚，暗黑木為主。賣嘅係「比較」高級嘅壽司。其中一個賣點就係呢條高科技迴轉帶。據稱（因為我見唔到），條帶可以分辨出碟壽司放咗係條帶上幾耐。如果超過一定時間，碟壽司就會被走。人客就唔會食到唔新鮮嘅壽司啦！好新奇呀！

而可以做到咁（如果唔係有鬼之外），都係因為隻碟。表面上除咗幾靚，好似冇乜特別。

其實特別在個碟底！

碟底（據稱）有粒精片（黑色嗰粒）。碟壽司出嘅時候會被記住時間。當行得一段時候，去到一個位置會被部掃描（我個位睇唔到）。如果發現碟壽司已經轉咗好耐，就會被轉返去俾師傅。當然，理論上係咁，有冇做到我唔知。而且時間定幾耐亦都冇人知。可惜我冇得親眼證實一下，但係帶上嘅壽司或刺身又真係幾新鮮喎。

但係去壽司店唔係食高科技。高科技只可以用嚟做泡沫，打 Cappuccino（爛gag…）。要壽司好食先得。而哩到啲質素又真係唔錯。值得一提嘅係吞拿魚腩壽司，好油好香好好味，入口即溶。雖然有小小筋，但睇埋價錢（$45 兩件），絕對可以接受餘。之後想叫多件都已經賣晒。

迴轉帶後面三位師傅非常專業。少說話，多做事，唔會口水四圍飛。

唯一可惜係條迴轉帶嘅設計。雖然話係高科技，但就係因為咁，出壽司嘅位置基本上係固定咗，因為要被掃描。如果好似我地咁坐龍尾，好多時都冇好野食。去得食迴轉壽司，就當然唔想落單啦。想睇住師傅整，自己揀自己鐘意嘅嚟食。所以只好主動出擊，趁師傅未攞去放落條帶之前，叫佢手下留壽司喇。嘻…



~ Lindberg