理髮店中

尋日因為發現啲頭髮好厚，見放工有啲時間，就忍唔住走去搵約翰幫我搞搞。正當剪得七七八八之時，我多口講句：

「上次你幫我電個頭，依家前面都差唔多直番晒囉。」

「係喎… 幫你輕輕再電一電。等佢企一啲。」

又電？！我隨便講下咋！雖然幾好玩，不過上次電完之後… 唉…

「吓？！耐唔耐呀？差不多八點囉喎。」

「好快，半個鐘就得！」

「咁…你話事啦。」

正所謂，牛唔飲水，點得㩒牛頭低呢。突然記起細個睇得 IQ 博士，入面個草菇妹妹成日話：「電髮電髮，人人都要電髮。電髮電髮，連毛蟲都要電髮…」莫非我就係一條毛蟲？唉…

「約翰，上次你幫我電個頭，我朋友見到我喺 blog 張相，話我似萬梓X呀！點算呀？」

「唔係呱？！」

「係呀！依家同佢絕咗交啦！」

「哈哈哈！」

約翰梗係見我太多好朋友，所以想幫我減少幾個…（講笑咋！）

當我等緊嘅時候，旁邊有兩個小朋友。一個三個月大，一個五六歲左右。五六歲嗰個俾另一位髮型師剪咗個和尚頭。好得意。我發現自從自己有咗細路之後，總覺得身邊嘅小朋好可愛咗好多。可能係愛屋及烏嘅關系呱。另一個三個月嘅小妹妹又剪光頭，可愛到暈。Jayson，你幾時先有頭髮俾人剪呀？唔好學爸爸媽媽得咁少頭髮呀！

電完之後，都覺得唔錯。不過俾佢再剪多兩下，塊肥面就走晒出嚟。唉… 所以每次去完約翰到剪頭髮，我都要匿埋幾日先好見人。嚇親朋友就唔好啦。

「幾好呀。有番個 volume。仲有啲似陳XX。」（聲明：並非陳冠希）

「係咩係咩？」點解我喺鏡到，淨係見到個日本老臭飛嘅？唉…

剪完之後去婆婆到搵呀 Jayson。佢見到我好開心，係咁（指住我）笑。（滴汗…）

番到屋企見到 Jayson 媽，佢見到我笑得仲厲害。都好嘅，剪完個頭可以俾屋企人開心下。而 Julie 就成晚都冇搵過我。唉…



~ Lindberg