高清真係好清呀！

前幾日終於攞咗買電視送嘅高清解碼器。一返到屋企當然要睇下無線嘅高清台，又真係幾清喎。但係都係要到尋晚睇無線高清台播放嘅《Lord of The Ring》，眼前一亮，先知道原來可以清成咁呀！

我屋企嘅設備有日立 37 吋全高清液晶體電視，加（送嘅）GIEC（杰科）高清解碼器。我覺得 37 吋係我個「豆潤咁細」嘅廳嘅極限，42 吋會太大。而其實 37 吋唔係好多廠做全高清，即 1080p。當時有兩部俾我選擇。日立同飛利浦。日立送高清解碼器，而飛利浦就送多一部 24 吋液晶體電腦屏幕。後者仲要平二千蚊。見係個非常之難嘅決擇，所以我請來好兄弟，AV 男，同我一齊去睇。經過一輪比較之後，AV 男同我都覺得日立嘅對比勁好多。雖然有時候會過火啲，暗位冇飛利浦做得咁好，但係買得高清液晶體電視，無非都係無時無刻想好似睇靚油畫一樣，顏色對比越勁越好啦。所以我選擇日立。

但係買咗之後，部電視都未真正發揮過「威力」。全屋企最高清都係得部 Wii，而且都只係得 720p。最多都係用部 Macbook，喺 Apple 個網頁，睇啲高清嘅影片預告。不過都唔係太過癮。

到咗尋晚，邊餵住 Jayson 食宵夜，邊睇《Lord of The Ring》，先發現原來真係可以好鬼清！除咗解像度高，色彩鮮豔，層次仲非常分明。「明」到自己以為真係去咗 Hobbits 嘅 Shire 一樣！最明顯係開頭 Gandalf 剛剛入 Shire 見到 Frodo，啲花花草草嘅色好靚，前後感好強。睇到我眼都突埋，差啲唔記得幫個仔掃風…

唯一可惜嘅就係，呢個「爛鬼」唔洗錢嘅高清解碼器，個字幕功能唔得。喺「高清嘅世界」，我地係可以好似睇 DVD 咁，自由選擇睇乜字幕。而我唔知點解我個就睇唔到。可能係部機冇被認可，而個高清標准又咁新，個軟體支援唔到。部機慢都算啦，但係冇字幕就好大問題。因為 Jayson 要瞓覺嘅關系，好多時候我地都要息聲睇字幕。所以冇字幕都唔知佢講乜！遲啲問下人可以點算先。唉…



~ Lindberg