擴大禁煙範圍一年後…

早幾日天氣凍行街，我同老婆話：

「妳發唔發覺呢，天氣越凍呢，啲咩就越犀利…」

「係呀，條街啲煙味就越勁。」

「係呀…係呀…」

其實我係想話天氣越凍，就越有啲女仔著啲短褲短裙出嚟。在嚴嚴寒冬，為我地男士送贈一股暖流。對此等衣著，深表感激。當然之後冇講到…

講開食煙，擴大禁煙範圍已經實行咗一年有多。唔知大家同唔同意，我自己覺得食多咗二手煙。

香港《吸煙(公眾衛生)條例》(香港法例第371章)，一般稱作吸煙條例或禁煙條例。條例於1982年訂立，是香港最主要的控煙法例。此法例旨在禁止在某些區域吸煙，並就煙草產品的包裝、售賣及推廣等方面作出限制和規管，並陸續修訂，2006年香港立法會通過大幅擴大禁煙範圍，在餐廳、酒吧、公園、扶手電梯以至室內公共地方等，均會作不同程度的禁煙。新禁煙令於2007年1月1日零時開始實施。

其實一直以來，我都覺得室內禁煙冇乜意思。喺一個開明嘅社會，我相信極少數嘅人會喺辦公室內煲煙。尤其是當你識得周圍嘅人，知道入面有人唔食煙。而且人天生係有一對腳，如果唔想同啲煙民困埋一齊，你可以行去第二到㗎嘛。例如我知道以前銅鑼灣某幾間茶餐廳特別多煙民聚集，而且通風做得唔係太好。知道咪唔去囉。雖然好似被迫避開咗佢地，對我地非吸煙者好唔公平，但如果食肆老板唔對我地體諒一下，我幫襯佢都費時。

如果間茶餐廳只係做煙民生意都夠做，當然要恭喜一下佢啦。但係如果只係得小貓幾隻，生意做唔住，佢自自然然會諗辦法去改善。加強通風設備、設非吸煙區、全餐廳禁煙、等等。所以食唔食得煙，最好咪由得個市場自己去淘汰同選擇囉。

我覺得之前未擴大禁煙範圍就好似困獸鬥，依家就似猛虎出籠一樣。個個都好似有大條道理咁，企喺條街到煲煙。公共米缸（即垃圾筒或煙灰缸）四周、商業大廈後門、食肆門口等等，往往都聚集一大班煙民。就好似幾個同事，或三五知己，啖天說地，你一口，我一口。漸漸演變成另一種社交活動。

有啲食煙嘅朋友仲懶衰，話係「我地」趕「佢地」出嚟。依家吹啖煙出嚟都小啲內疚感。當然，條街係空曠地方，煙好快會被吹走。但我覺得討厭程度真係仲差過以前。起碼一出街就真係好似聞多咗煙味。「濃度」係高至甚高。

其實 2006 年尾去新加坡都已經發覺呢個現象。佢地都有類似香港嘅禁煙條例。條街都係好煙。當時心諗如果香港實行又會變成點。答案原來係一模一樣。

莫非要做到好似日本咁，連一啲主要街道都禁埋？

而對餐廳生意上，其實都影響唔少。起初啲人會話，食煙嘅都會食飯㗎啦，影響都會有限度啫。其實對某啲食肆而言會係。即使話係茶餐廳，我相信（至少係自己所見）啲人都會照常食個下午茶餐，之後行出外面煲煙。可能因為咁，茶餐廳仲可以做多一轉半轉，生意仲好咗添。但係對於我地做西餐廳就慘啲。以前啲人食飽飯，都會留低食個甜品，飲杯咖啡。依家好多時都見，只要一張枱之中有一個煙民，啲人就會趕住走出外面，或去第二場，如可以食煙嘅酒吧或有露天位置嘅食肆。所以好明顯見到自己某幾間餐廳，餐後飲品係賣少好多。有間差唔多得番一半。而呢個亦都係新加坡一早証實嘅問題。

因為人為嘅干預（立法），我睇都要等個市場慢慢調節一下啦。唉…



~ Lindberg