偷懶澳門兩天之旅

因為 Jayson 媽下星期開始要返番工，所以特別向婆婆請兩日假。請假嘅意思就係放 Jayson 係婆婆到過一晚，而我地兩個就「過大海」，去飲飲食食同埋休息一下。當然我都喺公司請兩日假，因為唔想撞正周末鬼死咁多人。

但係都唔知係唔係我地偷懶嘅關系，尋日回程波折重重，個天好似懲罰我地一樣。不過好彩有驚無險。

之前其實一早已經應承咗 Jayson 媽過去澳門同佢一齊做個 Spa。講起做 Spa，第一時間就諗起我最鐘意嘅東方文華，因為佢地有個靚靚嘅 Spa & Resort。除此之外，我好鐘意好鐘意佢張床同個枕頭。雖然我係乜野環境下都瞓得著嘅人，不過喺呢到瞓，仲舒服過喺自己屋企。可以真係話「戀上你的床」。

今次喺東方文華，服務真係一流。唔知同近期行業之間嘅競爭有冇關系。今次我地都有些少特別要求，佢地都一一做到。我覺得非常之滿意同感激。

而對於東方文華嘅「偏愛」，係由以前做過嘅一份功課起。講到東方文華喺形象、包裝、推廣等各方面，落咗嘅功夫。所以好鐘意佢俾我嘅感覺，而且個 Spa 又真係做得唔錯。我今次做完之後好舒服。Jayson 媽就感覺都還可以，不過好似仲差一啲啲。可能佢真係太攰啦。

今次嚟嘅目的係做頭先講嘅 Spa，其次係以休息為主，俾 Jayson 媽喺冇壓力下可以休息一下，所以都唔會趕去食呢到、睇嗰到。食方面，去咗間舊式茶樓飲咗個茶，食咗兩餐自助餐（冇錯，又係自助餐！唔知邊個先幾日先話打死都唔會再食自助餐…），食椒鹽田雞同水蟹粥，仲有一餐冇預計嘅晚飯。

觀光方面，去咗游覽威尼斯…人。我覺得入咗去，真係同去咗有「水都」之稱嘅威尼斯冇乜分別。唯一嘅分別就係有冷氣同埋《東方紅》。

除此之外，內外每一處都令人嘆為觀止。厲害厲害…

不過我發現啲貢多拉船，原來唔係好似意大利嘅靠人力推動。呢到係靠馬達，然後用腳去控制向前向後。雖然如此，每位船夫都能歌善舞，令四周增添唔少氣氛。

見到個聖馬可廣場真係無話可說。最多都係一句：「洗唔洗呀？！」

今次嚟澳門，我發現基本上係唔洗坐乜野公共交通工具。喺碼頭去每間大型賭場，都有佢地自己嘅穿梭巴士服務。呢個一早都知啦。但又例如喺東方文華想去威尼斯人，只要行過兩步到金沙，就有穿梭巴士坐。非常方便。見坐咗咁多免費巴士，又影咗佢咁多相，於是入咗威尼斯人個賭場進貢咗少少。嘻…

原本坐六點鐘船返香港。點知去到碼頭，先話太大霧開唔到船。原來除咗打風，大霧都返唔到香港。唉… 負責人叫我地去「玩下」先。張飛聽日十二點前都用得。我見有啲人改走陸路，經珠海返香港。話晒都唔知要等幾耐。而我地都冇回鄉証，所以都唔去得邊。於是我地就打電話返屋企報告情況，然後四圍搵野食。由於無準備，最後都係是是但但食一餐，再去睇下情況點。

食飽飯返到碼頭，見啲霧散咗唔少，而所有賣船飛嘅櫃位都關晒，唔再賣今晚嘅船飛，以便疏導之前滯留嘅人。我地都叫做好好彩，一去到就剛剛開始俾人入去等船。原本應該係等九點鐘嘅船，不過過晒鐘都未放人落船。原來之前已經開咗一架，仲要同一架香港嚟澳門嘅船撞埋一齊！好彩我地冇早到，上咗嗰班船。見架船開返嚟碼頭，船頭爛咗啲，而且都有唔少人受咗傷。

等到十一點，終於有船開。一上到船，出奇地已經有好多人坐喺到。原來佢地就係坐之前嗰班船嘅人。我隔離兩個都話撞得幾應，見有人食食下碗麵，就成碗麵飛埋塊面嚟！之後落船，我仲見有啲嬸嬸行到跛下跛下。

滯留澳門五小時，終於開船返香港。不過開船時嘅心情都好矛盾。其實天氣仲係好差，越來越大霧。但係又好想返屋企。雖然已經講明叫 Jayson 留多喺婆婆到一晚，但係屋企仲有一對仔女。食物同廁所頂多可以用到今晚。所以一定要返屋企。上天庇佑，架船慢慢行，行咗個半鐘有多，終於安全返港。


~ Lindberg

P.S. 返到屋企，七國咁亂。兩隻野餓到連薑餅人都唔放過。超級冇陰功！阿威阿妹，阿爸阿媽都唔想㗎！

P.P.S. 雖然舊年因為要陪媽媽去玩嘅關系，都嚟過好多次澳門。不過每次嚟都覺得好唔同。亦都成日令我反思，以後嘅香港同澳門會變成點呢？