不盡責的爸爸

尋日整個晏晝都坐立不安。一放工立即飛返屋企。一開門，就見阿威碗飯冇郁過。阿威，您仲乜又唔食飯呀？

同威媽傾過之後，見佢鼻仔有少少鼻水，可能聞唔到「飯香」，而冇晒胃口。雖然阿威唔鐘意出街，而且天氣又突然咁凍，但係都係決定帶佢俾醫生睇一睇先安心。

「3.2 kg… 之前有成 4.6 kg。嘩！乜你瘦咗咁多嘅？失戀呀？」靚靚護士姑娘問。

「冇失戀呀。失寵囉…」我答。

足足瘦咗三磅有多。個心好痛。

醫生話病徵唔多，最主要問題係唔知點解瘦咗咁多。可能因為瘦得太犀利，抵抗力差咗，先會染上傷風感冒。其實我地都係呢兩日先見佢冇乜食飯。之前我都仲鬧梗佢偷食埋阿妹啲野。最大可能就係多咗個細佬，全家人嘅主意力都去晒細佬到，而冷落咗阿威，所以唔開心，慢慢瘦落嚟。諗返起，都好耐冇抱過阿威啦。阿威同阿妹唔同，阿妹好黐人，有理冇理都逼你抱佢，俾個屁股你聞。到尋日發現阿威冇食野，一抱起佢，竟然仲輕過阿妹！

醫生叫我繼續觀察佢。如果仲係唔食野，安全啲就做啲檢查。驚就驚在係內臟有事，到時最好就抽下血，驗下尿。

醫生，你唔好嚇我啦。

…好辛苦咁忍住，忍住唔好俾啲眼淚流出嚟。

諗起 Lucky，當時我係一個不盡責嘅哥哥。冇乜養貓常識，佢鐘意食乜就俾乜佢食，搞到之後個腎有事，最後離開咗我。所以我依家更加唔想做一個不盡責的爸爸。

我好驚佢會有糖尿病或腎病之類。唉…

醫生開咗一啲抗生素，同埋開胃藥俾阿威。食完藥兩個鐘之後就嘔嘔。嘔啲黃膽水出嚟。只係見佢飲水，但就冇食飯。好彩唔算飲得太多，去廁所亦唔覺特別多次。仲見佢有少少大便去。希望只係因為情緒問題啦。今晚要買啲阿威鐘意食嘅野，早啲返屋企陪下佢。而 Jayson 就由得婆婆同媽媽湊住先啦。

~ Lindberg


P.S. 個護士姑娘（唔係之前靚靚嗰個），開錯隻收鼻水藥俾阿威，應該係開胃藥先啱。好彩我記得醫生話會有隻開胃藥，唔係就又有醫療失誤啦！唉…