金菇肥牛炒意

呢個意粉係好多年前，君悅酒店酒店教人煮野食學嘅。做法好簡單，又好食。不過就油少少，所以冬天先會煮。

材料（二人份）：
意大利粉
肥牛半磅
金菇在包
洋蔥 1/4 個切絲
蒜頭切碎
牛油一小塊（15克左右）
日本醬油

先將意粉煮到九成熟，過冷河。用少少橄欖油炒軟啲洋蔥同蒜頭。千祈唔好落太多油，因為肥牛會出油。

之後就可以落肥牛。

如果發現肥牛出太多油，可以考慮換鑊。肥牛差唔多熟就可以落番啲意粉同金菇。金菇唔可以太早落，唔係就會縮晒水。依家可以落些少上湯，有白酒的話都可以灑一啲。再放舊牛油。然後就慢慢落日本醬油，落到夠鹹為止。食得！

個意粉嘅重點係牛油同日本醬油，味道非常之夾。金菇吸咗啲油好滑，好好食。不過真係會幾油。所以要睇清楚啲肥牛有幾油，先好落橄欖油同牛油呀。



~ Lindberg